Ալիևը կովիդից չի վախենում, այլ պատերազմի հետագա ընթացքից և դրա սպասվող հետևանքներից.Տաթևիկ Հայրապետյան
Ադրբեջանում հատուկ կարանտինային ռեժիմը երկարացվել է մինչև դեկտեմբերի 1-ը։ Փակվում են նոր քաղաքներ և բնակավայրեր, հստակ կարող եմ ասել, որ դրանք դեմոգրաֆիական առումով գերազանցապես ազգային փոքրամասնություններով են բնակեցված, մասնավորապես՝ լեզգիաբնակ, թալիշաբնակ և թաթաբնակ բնակավայրեր են։ Ալիևի իշխանությունը, որը թույլ էր տալիս և խրախուսում, որ ամիսներ առաջ՝ համավարակի թեժ պահին մի քանի հազարանոց ցույց կազմակերպվեր Բաքվում 《Մահ հայերին》 կոչերով, հիմա առանձնակի 《հոգատարություն》, իսկ իրականում վախ և զգուշություն է ցուցաբերում ազգային փոքրամասնություններով բնակեցված շրջաններին նկատմամբ։ Ալիևը հաստատ զգուշանալու և վախենալու շատ բան ունի։ Չմոռանանք, որ 90-ականներին պատերազմի արդյունքում ձևավորվել է Թալիշ Մուղանյան հանրապետությունը, որը թեև արագ վերացվեց, բայց լուրջ հետևանքներ ունեցավ Ադրբեջանի ներքաղաքական կյանքի վրա։
